Walther von der Vogelweide Sîn rât und bœses fleisches gir (Leich B) Liedtext

1.

Sîn rât und bœses fleisches gir,

die hânt geverret, hêr, uns dir.

sît disiu zwei dir sint ze balt,

und dû der beider hâst gewalt,

Sô tuo daz dînem namen ze lobe

und hilf uns, daz wir mit dir obe

geligen und daz dîn kraft uns gebe

sô starke stæte widerstrebe,

2.

Dâ von dîn name wirt geêret

und ouch dîn lop gemêret.

Dâ von wirt er geunêret,

der uns dâ sünde lêret.

3.

Und der uns ûf unkiusche jaget.

sîn kraft von dîner kraft verzaget,

des sî dir iemer lob gesaget,

Und ouch der reinen süezen maget,

von der uns ist der sun betaget,

der ir ze kinde wol behaget.