Walther von der Vogelweide Liedtext

Walther von der Vogelweide Hêr Volcnant habt irs êre Liedtext

Hêr Volcnant habt irs êre,

daz ir den meistern tretten welt

ir meisterlîchen sprüche?

Lâtz iu geschehen niht mêre,

sît daz manz iu zunwitzen zelt.

wan ob hêr Walther krüche,

man het in doch vil baz danne iu.

er ist daz korn, ir sît diu spriu,

singet ir einz, er singet driu,

ir sît gelîch als ars und mâne.

Her Walther singet, swaz er wil,

des kurzen und des langen vil,

sus mêret er der werlt ir spil,

so jaget ir als ein valscher hunt nâch wâne.

Waz êren hât frô Bône,

daz man von ir singen sol,

si rehtiu vastenkiuwe!

Sist vor und nâch der nône

fûl und ist der wibel vol,

wan êrst in der niuwe.

Ein halm ist kreftec unde guot:

waz er uns allen liebes tuot,

er fröit vil manigem sînen muot,

wie danne umb sînen sâmen?

Von grase wirdet halm ze strô,

er machet manic herze frô,

er ist guot nider unde hô.

frouwe Bône, set liberâ nos â mâlô,

âmen.